Një humbje e rëndë ka prekur gazetaren e njohur Dorjana Bezat, e cila të shtunën dha lajmin e trishtë për ndarjen nga jeta të bashkëshortit të saj, duke lënë pas dhimbje të madhe për familjen dhe të afërmit.
Dorjana Bezat, e njohur për punën e saj në fushën e gazetarisë në sektorin e kronikës së zezë ka prekur shumë zemra me mesazhin e saj dedikuar shokut të jetës në rrjetet sociale, ku shpreh dhimbjen e thellë për këtë humbje të pazëvendësueshme.
“Me hidhërim të thellë, njoftojmë humbjen e parakohshme nga jeta të të shtrenjtit tonë, Anis Fama .
Ai luftoi për jetën me forcë dhe besim, por nuk e fitoi dot betejën me sëmundjen e pashërueshme. Unë dhe Adeo do ta kemi përjetësisht në zemër, dhe ai do të jetojë në kujtimet tona si bashkëudhëtari im i 15 viteve dhe si një baba që fali dashuri të pakufijshme.
Allahu e mëshiroftë dhe i faltë xhenetin 🤲🏻
Sipas amanetit të tij, Anisi ynë do të prehet në qytetin e lindjes, në Korçë. Lamtumira do t’i jepet te shtëpia funerale “Imperial”.
Varrimi të dielën ora 11.00”
Miq, kolegë dhe qytetarë të shumtë kanë shprehur ngushëllimet e tyre dhe mbështetjen për gazetaren dhe djalin e saj të mitur. Ngushëllime familjes edhe nga AIA.AL!
